#IsangTaon

Ni CieloAmethyst

Feb.23,2016

(Isang espesyal na tula para isang espesyal na tao)

Kay bilis talaga ng panahon

Lumipas na pala ang isang taon

Mula nang piliin mo akong saktan 

At kalaunan nga ay tuluyan nang iwan.

(Oo sobrang sakit niyon na para akong pinapatay nang dahan-dahan)

Pagmamahalan natin ay iyong itinapon

Binalewala ang mahaba nating kahapon.

Ang sabi mo ay hindi ka na masaya 

At kalaunan inamin mong may mahal ka na ngang iba

(Ang puso ay parang pinipiga na tila walang makakatalo sa sakit na nadarama)

Sobrang sakit dinurog ang puso ko

Na nagmahal lamang ng tapat sa'yo

Hindi pala sapat ang inalay na pagmamahal

Hindi pala tayo tunay na magtatagal

(Umasang ikaw na ang nakatakda para makasama habambuhay ngunit hindi pala)

Umiyak, nagwala, tumawa, naglasing

Mga gabing walang tulog na mahimbing

Pati pagkain ay tinalikuran na rin

Wala nang ibang inisip kundi ikaw at ikaw pa rin.

(Sapagkat wagas kang minahal...)

Kinapitan ang Diyos upang muling makabangon

Pamilya at mga kaibigan ay tumulong sa pag-ahon.

Kalaunan ay muling naranasan ang sumaya

At muling natanaw ang isang buhay na maganda.

(Kaya ko palang lumigaya sa piling na wala ka.)

Inabala ang sarili sa maraming bagay

Mga magagandang lugar ay aking tinunghay.

Mga bagong tao ay dumating sa buhay 

Tuluyan nang nakalimot sa mundong may madilim na kulay.

(Lumiwanag ang daigdig at tuluyang sumasaya sa paglipas ng mga araw.)

Salamat sa lahat ng alaalang masaya

Salamat sa mga aral na aking nakuha

Ang "Tayo" man ay nagwakas na nga

Sana ay manatiling masaya ang isa't isa. 

(Maging ito man ay sa piling na ng iba.)

Sa loob ng isang taon na kay raming nangyari

Nasaktan, natuto, nadapa, tumayo at ngumiti

Wala na ang tayo at ang meron nalang ay ikaw at ako.

Masaya pa rin dahil sa mga buhay nating nagbago.

(Nagbago na nakabuti para sa atin pareho.)

Kung dati ay mahal na mahal kita nang higit pa sa sarili

Sa isang taon ay akin nang napanatili 

Ang kaligayahan ay dapat munang madama 

Sa ating mga puso bago ito tuluyang ipamahagi.

(Natutong sumaya nang hindi dumedepende sa iba.)

Hangad ko ang kaligayahan at kabutihan para sa'yo

Sana ay mahanap na ang tunay na nakatakda sa puso mo

Ang pagpapatawad ay ibinibigay na sa iyo.

Maraming salamat sa lahat dating Mahal Ko.

(Tayo nang umusad sa panibagong taon ng ating magkahiwalay ng mga buhay.)